%20(1).jpeg)
رواية انا وابن خالتي الفصل السادس 6 الجزء الخامس بقلم عمرو راشد
انت هتعمل ايه؟
= هشوف السلسلة بس وهرجعها تاني
عبدالله انا مش مطمن للمكان دا،، السلطان محذرنا ندخل هنا يبقا اكيد في حاجة
= وجيت ليه طالما في حاجة؟
كان عندي فضول وخلاص عرفت ايه اللي موجود في الأوضة،، يلا نمشي بقا
= هشوف السلسلة وهنمشي
" مديت ايدي وفكيت السلسلة منها وخدتها،، لكن في نفس الوقت لقيت سك*ينة خرجت من الحيطة قدامنا وطارت علينا،، شاهر شد ايدي بسرعة عشان يبعدني عنها،، السكينة دخلت في الحيطة اللي ورانا وفي اللحظة دي سمعت صوت مرعب بيقول
" لقد ايقظت الأميرة النائمة والآن لن ترى نور الشمس مجدداً
" بعدت خطوتين ل ورا بعد ما رميت السلسلة من ايدي،، شاهر ساعتها شدني من ايدي وقالي
انت واقف مستني ابن،، يلا بسرعة نخرج من هنا
" جرينا بسرعة عشان نفتح الباب لكن الباب مكنش بيفتح،، حاولنا بكل قوتنا وبرضو مفيش فايدة،، كل حاجة بدأت تتكسر في الأوضة ولاحظت ان التمثالين اللي كانو جنب المومياء بيحاولو يتحركو من مكانهم لكنهم كانو ثابتين في الأرض،، شاهر جري على الشباك لكن كان في قضبان موجودة عليا،، بدأ يصرخ وينادي على اي حد ييجي ينقذنا،، بس في الوقت دا خدت بالي ان الحيطان بتقفل علينا،، حيطان الأوضة بتتحرك من مكانها وهتقفل علينا،، بقيت واقف مش عارف اعمل ايه ولا اتصرف ازاي،، شاهر كان واقف قدامي وباصصلي وبيتكلم لكن انا مش سامعه،، مش سامع غير صوت صفارة وكأني انفصلت عن العالم تماما،، كل حاجة بتقول اننا انتهينا خلاص،، الحيطان بتقرب علينا اكتر،، الصوت بدأ يرجع تدريجي وسمعت شاهر وهو بيقول
سامعني،، روح اقف عند الباب و خبط
" في نفس اللحظة دي شوفت الغراب واقف برا الشباك،، الغراب اللي شوفته في السوق،، مكنتش فاكر اسمه ايه،، جريت بسرعة ناحية الشباك وقولتله
انقذنا من هنا ابوس ايدك احنا هنمو*ت
" بعد الجملة دي الغراب طار وانا سيبت الشباك و بدأت ادور في الأوضة،، شاهر نادى عليا وقالي
انت بتعمل ايه؟
= دور معايا على اي حاجة معدن وتكون طويل نعطل بيها الحيطة لحد ما الغراب يرجع
غراب مين دا اللي هيخرجنا من هنا؟ وهيخرجنا من الشباك ازاي؟
= دور وانت ساكت بقا
" الحيطة كانت بتقفل اكتر لحد ما بدأت احس بضيق تنفس و في نفس الوقت مكنتش لاقي حاجة تنفع،، قعدت على الأرض واستسلمت وشاهر كمان قعد لان مفيش حلول قدامنا،، بصيت ل شاهر ساعتها وقولتله
متزعلش مني
" كان باصص ليا ومش بيرد وبعدها بص قدامه،، بعدها غمضت عنيا وبدأت اتشاهد لان خلاص مبقاش في وقت،، بس وانا بتشاهد سمعت صوت انا عارفه،، صوت شهيرة اللي كانت واقفة قدامنا وبتقول
حالتكم صعبة أوي،، محتاجين أي مساعدة؟
" شاهر قام وجري عليها وقالها
خرجينا من هنا يا شهيرة مفيش وقت
= مش قبل ما تقول كنت بتعمل ايه هنا؟
هقولك كل حاجة بس يلا بسرعة،، الحيطة هتقفل علينا
" قومت انا كمان ووقفت جنب شاهر وقولتلها
يا شهيرة انا السبب،، انا اللي قولتله ييجي معايا لكن هو كان رافض بس جه عشان مبقاش لوحدي،، مبقاش في وقت خرجينا من هنا بقا
= اممم حيث كدا يبقا طلبك مُجاب
" مِسكت ايدينا و في ثانية لقينا نفسنا واقفين في ساحة القصر الكبيرة لكن احنا مش لوحدنا،، كان الوزير دايم واقف في المقدمة ووراه هارون ومروان،، الوزير كان باين عليه الغضب الشديد،، و بعدها قرب مننا وقال بحدة
السلطان نور الدين حذركم من دخول الغرفة دي،، صح؟
" شاهر رد عليه
احنا كان عندنا فضول بس نعرف فيها ايه محدش فينا كان يعرف ان دا ممكن يحصل
= انتو كنتو هتتسببو في مو*تكم ومو*ت اهل المدينة كلهم،، المومياء دي ملعونة وحاولنا نحل الطلاسم اللي عليها ولكن كل مرة بنفشل ولذلك السلطان نور الدين حذر اي حد من الدخول خوف من ان اللعنة تصيبه
= اللعنة دي موجودة في السلسلة صح؟
انت مسكت السلسلة؟
" رديت انا بدل شاهر
أنا اللي مسكتها
" الوزير غمض عنيه و اخد نفس عميق وبعدها بثواني فتح عينه وقال
اللعنة هتصيبك يا عبدالله،، بقولها ليك من دلوقتي اياك تستسلم
" هارون اتحرك ووقف قدام الوزير وقاله
هو ايه اللي هيحصل بالظبط؟
= اي شخص بيفكر انه يمسك السلسلة دي بيتلعن لانها هي اللي عليها الطلاسم
والطلاسم دي هتتفك ازاي؟
= أخبرتك منذ قليل اننا فشلنا في تفكيكها
وايه الحل؟
= الحل عندك يا هارون
مش فاهم
= العالم السفلي،، أعتقد أن هيكون عندك مهمة في العالم السفلي
مهمة ازاي يعني مش فاهم؟
= انت الوحيد القادر على حل المشكلة دي من خلال الرموز اللي موجودة في عالم الجن ومن خلال الرموز دي هنقدر نوقف اللعنة
وانا هنزل عالم الجن ازاي وانا اساسا مش من الجن؟
" الوزير دايم بص ل شهيرة وابتسم
في تعويذة ممكن اقرأها عليك انت وشهيرة،، التعويذة دي هتبدل ارواحكم،، يعني روحك هتكون جوا جسد شهيرة و روح شهيرة هتكون جوا جسدك يا هارون
= بس السلطان نور الدين كان قال انه هيساعدني ارجع ل عالم الجن تاني
= والسلطان مازال لم يجد الطريقة
يعني ايه؟ يعني كان بيضحك عليا؟
= تأدب في كلامك يا هارون
" مروان دخل في الحوار وقال
يا جماعة اهدو مش وقته اللي بتعملوه دا،، لو التعويذة دي هتساعد عبدالله يبقا ايه المانع يا هارون؟
= وانت فاكر انهم تحت مش هيكشفوني؟
هما بيشوفو الروح يعني؟
بيحسو بيها و روحي انا بالذات هيحسو بيها لو على بُعد أميال
" شهيرة ردت وقالت للوزير
طب ليه مروحش انا؟
= لان هارون روحه اقوى وقادر على مواجهة أي شئ صعب ممكن يقابله
انا كمان على فكرة اقدر اهزم اي حد،، متستهونش بيا
= العفو يا سيدتي ولكن هارون اقوى و اذكى واقدم منك،، فرصتك في الرجوع من عالم الجن تقديرها 50% ولكن فرصة هارون 100%
" كلنا كنا ساكتين ومحدش بيرد لحد ما الوزير اتكلم مرة تانية
اللعنة يبدأ تأثيرها بعد ثلاثة ايام فقط وبعدها المعاناه هتبدأ،، فكرو
" خلص كلامه ومشي،، و مروان هو اللي اتكلم الاول
هنعمل ايه يا جماعة
" رديت انا وانا باصص ل هارون
قبل اي حاجة أنا آسف بس صدقني لو انت مش عايز تعمل دا هيكون حقك ومش هزعل منك،، انا اللي المفروض ادفع تمن فضولي
" هارون رفع وشه وكانت حواجبه معقودة
وانت فاكر اننا هنقف نتفرج عليك ونسكت؟
= انا مش عايز يتأ*ذي بسببي
" شهيرة ردت عليا
انا عن نفسي موافقة المهم محدش فينا يتأذ*ي
" وشاهر قال
احنا زي ما جينا هنا مع بعض هنمشي مع بعض ولا ايه يا هارون؟
" هارون بص ل شاهر وقاله
انا زهقت و مبقتش عارف حاجة
" بعدها سابنا ومشي،، مروان قال ساعتها
باين عليه لسة متأثر من الحالة اللي كان فيها
" شهيرة ردت
لازم نساعده يخرج منها يا جماعة،، لازم و في اسرع وقت،، الحالة دي لما بتتملك من بني آدم بتقت*له
" شاهر رد عليها
الكلام دا عمره ما هيحصل طول ما انا موجود،، محدش يقلق وكل حاجة هتكون كويسة،، كل حاجة هتمشي زي ما احنا مخططين واحسن كمان بس نفضل مع بعض دايما
" مروان رد
طب ايه الخطوة الجايه؟
= اننا ننام دلوقتي وبكرا نشوف هنعمل ايه
" كل واحد فينا دخل اوضته عشان ينام ويرتاح ولكن انا كنت عمري ما هعرف انام بسبب اللي شوفته وسمعته،، احنا بنتعاقب عشان دخلنا في مكان مكنش المفروض ندخله،، كل يوم هيعدي علينا واحنا هنا هنتعاقب عليه،، طبعا معرفتش انام وفضلت صاحي لحد ما الشمس ظهرت وخرجت من الأوضة لقيت شاهر قدامي
باين عليك منمتش
= انام ازاي وسط اللي احنا فيه دا يا شاهر
انا عرفت انت محتاج ايه؟
= حضن حنين
قلب كبير؟
= دا انت متابع بقا
كل الكليبات معايا،، ابعتهملك بلوتوث لو تحب؟
= طب معاك فيلم بنات وموتسيكلات؟
معايا البنات بس
= والموتسيكلات فين؟
انت مالك بالموتسيكلات يا شاهر ما تتفرج على البنات وانت ساكت
" و احنا بنتكلم لقينا صابرينا ماشية من جنبنا،، شاهر اتكلم بصوت عالي وقالها
ما بلاش اللون راح تتعب اوي ويانا
" صابرينا وقفت وبصتله وقالت بإستغراب
نعم؟
= انا مبكلمكيش أنتي،، انا بكلم عبدالله
هو انتي فاكرني غبية للدرجادي؟
= لا سمح الله مين قال كدا؟
طريقتك
= طب هو احنا هنفضل نتكلم كدا من غير ما نشرب حاجة؟
نشرب هنا؟
= ومالو هنا؟
" بعدها شاهر بص ليا وقالي
عبدالله
= عايز ايه؟
واحد كونياك لو سمحت
= مبقاش في كونياك،، خلص والله العظيم خلص ثم انت مين اللي قالك انك كدا جامد يعني
شوفتها في فيلم قبل ما نيجي وكان البطل بيقول كدا
= والبطلة عملت معاه ايه؟
عملت اللي محدش يعمله
= اللي هو ايه؟
معملتش حاجة ماهو مفيش حد عملها قبل كدا ولا ايه
" صابرينا قطعت كلامنا
استأذن انا طب؟
" شاهر رد عليها
استني هو احنا مش هنكمل كلامنا؟
= انا خايفة مراتك تيجي وتشوفنا وتتضايق؟
مراتي مين انا مش متجوز اساسا
= وشهيرة دي تبقا مين؟
انا متجوزتهاش ولا ليا علاقة بيها
= بس انا شوفت عقد الجواز
دا العقد مزيف حضرتك يا استاذة سالي
" خبطت على كتفه وقولتله
خلصت فقرة كروان مشاكل دي ولا لسة عندك تاني؟
= الحقيقة خلصتها
" صابرينا اتكلمت وقالت
طب عن إذنكم عشان اتأخرت وهنكمل كلامنا بعدين يا شاهر
" هي مشيت واحنا كمان اتحركنا من قدام الأوضة لحد ما وصلنا للساحة وهناك شوفنا الغراب مرة تانية،، ساعتها قربت منه
انت اللي جيت امبارح عند الشباك صح؟
" الغراب اتحول في ثانية لنفس الشخص اللي شوفناه في السوق
نعم انا صهيب
= يعني انت امبارح تشوفنا في مشكلة زي دي وتسيبنا وتمشي؟
انا مشيت و روحت عند صديقتكم شهيرة وهي اللي انقذتكم
= يعني انت اللي قولتلها؟
نعم
" شاهر قرب ووقف جنبي وقال
واحنا متشكرين ليك جدا يا صهيب،، انت أنقذت حياتنا
= حياتكم مازالت في خطر يا شاهر،، غضب الأميرة النائمة سيلاحقكم في كل مكان
والسلطان ميعرفش يحل الموضوع دا؟
= اعتقد يعرف بس هنا كل شئ مبني على عهود والسلطان نور الدين لا يمكن يخالف العهود
عهود ايه؟
= العهود السُليمانية
و دي معناها ايه؟
= شرحها يطول
طب ما تشرحلنا
= ليس لي حق الكلام عن هذا
قول اي حاجة تساعدنا بيها طيب
= اكبر خطأ ارتكبتوه في حياتكم هو دخولكم ل هذه المدينة
" مروان وهند دخلو علينا واحنا واقفين و كانت هند باين عليها الزعل وقالت
هو صحيح اللي انا سمعته دا؟،، انتو دخلتو الأوضة اللي السلطان حذرنا منها؟
" رديت عليها
غلطة والله
= مروان قالي ان اللعنة هتبدأ تطاردك يا عبدالله،، انت متخيل عملت في نفسك ايه؟،، ليه يا عبدالله ليه عملت كدا؟
" سكت ومعرفتش ارد عليها اما صهيب كان مشي وفضلنا احنا الأربعة واقفين محدش فينا بيتكلم لحد ما مروان قال
انا ممكن أتكلم مع هارون تاني
" هند ردت عليه
وهو فين هارون اصلا؟
" الوزير دخل علينا واحنا بنتكلم وهو اللي رد علينا
هارون خرج من الصبح،، قال انه محتاج وقت يفكر مع نفسه
" شاهر رد عليه
متعرفش راح فين؟
= للاسف لا،، ياريت تتكلمو معاه وتقنعوه لان الوضع غير محتمل التأخير و احنا هنكون غير قادرين على مساعدتكم
" الوزير مشي و مروان وقف قدامنا واتكلم بعصبية
انا قولتلكم من الاول بلاش،، قولتلكم بلاش نيجي هنا،، قولت المكان دا خطر،، أي حاجة مش مسموحة اننا نشوفها يبقا خطر،، ربنا بعتلنا الف إنذار واحنا في الطريق وبرضو كملنا،، ياريت تكونو مرتاحين دلوقتي،، انا هكلم السلطان وهخرج من المدينة وهرجع ل ابني مهما كان ايه اللي هيحصل
" شاهر رد عليه
انا عايزك تبقا فاهم يا مروان ان هارون عمل الصح
" مروان رد عليه بعصبية
عمل الصح لنفسه مش لينا،، هو عمل دا كله مش عشان ينقذ الناس هناك لا دا عشان كان عنده احساس ان دخوله المدينة ممكن يرجعه ل عالم الجن تاني،، هارون مفكرش فينا قد ما فكر في نفسه
= و دلوقتي مين اللي هينقذنا؟،، ماهو هارون برضو
عشان هو السبب في دا
= حتى لو هو السبب فهو برضو اللي قادر ينقذنا
انا مليت منكم ومن ثقتكم الزيادة فيه،، انتو بقيتو تقرفو وانا مبقتش طايق حد فيكم
" مروان مشي وخرج من القصر وهند راحت وراه اما انا مكنتش عارف اعمل ايه،، شاهر قعد و اخد جنب ومتكلمش وأنا كنت مُحرج وعايز امشي
انا هرجع الأوضة
= ماشي
وانت؟
= انا هستنا هارون لما يرجع
" سيبته و رجعت اوضتي و نمت على السرير يمكن المرادي اعرف انام فعلا
" الشمس غابت والليل ظهر،، القمر كان مكتمل وبارز بشده،، كان لازم ارجع القصر وفعلا مشيت و رجعت واول ما دخلت لقيت شاهر قاعد في ساحة القصر
مالك قاعد كدا ليه؟
= مستنيك
في حاجة؟
= كنت عايز اطمن عليك،، انت مقولتش لحد انك خارج
كنت محتاج اكون لوحدي شوية
= وبقيت لوحدك؟
مش هتفرق لإني دايما لوحدي
= لا يا هارون احنا معاك و جنبك
وانا لما قعدت في بيتي مبكلمش حد ولا بخرج حتى،، مين اللي سأل عليا؟،، انت اتجوزت و هما كل واحد فيهم عايش حياته و انا اللي لوحدي،، فرقت ايه بقا زمان عن دلوقتي
= اننا واقعين في مشكلة
و طبعا انا اللي المفروض احلها زي كل مرة
= مفيش غيرك هيحلها يا هارون
ماهو دا العادي مفيش جديد،، عموما ماشي انا هتكلم مع الوزير الصبح عشان اشوف ايه المطلوب مني
= طب يا هارون...
ايه تاني بقا،، خلاص يا شاهر انا محتاج ارتاح دلوقتي عن اذنك
" كملت ومشيت لحد اوضتي ودخلت وقفلت الباب ورايا،، رميت نفسي على السرير وباصص للسقف لحد ما سمعت باب الأوضة بيخبط،، قومت فتحت لقيته شاهر،، نفخت بضيق ولفيت وشي عنه ودخلت وقولت
في ايه يا شاهر انا قولتلك عايز ارتاح،، انت مبتفهمش يااخي؟
" مسمعتش رد،، اتعصبت اكتر وبصيت ورايا لكن ملقتش حد،، خرجت من الأوضة وبصيت يمين وشمال مكنش في اي حد،، قلبي بدأ يدق بسرعة،، رجعت الأوضة بسرعة عشان اشوف شاهر ومروان وعبدالله جوا الأوضة واقفين بيضحكو،، دخلت وقولتلهم
هو في ايه؟ انتو هتلعبو معايا ولا ايه؟
" مروان رد عليا بهدوء شديد
اهدى يا هارون،، احنا جايين نطمن عليك
= مروان انا مش فايق للهزار دا،، اطلعو برا دلوقتي
مروان!!!!،، مين قالك اني مروان؟
#عمرو_راشد
#انا_وابن_خالتي 5 " كنز مدينة النحاس " 6
#يتبع
